JAKINTZA IKASTOLA ORDIZIA LEHEN HEZKUNTZA

Goierriko proiektuaren lanketa oraindik amaitu ez bada ere, horra hor ikasleek ematen dizkiguten azalpenak.

Lehen Hezkuntzako 4. mailako ikasleek Txanela Proiektuaren barnean egiten ari diren Goierriari buruzko lanaren prestakuntzarako, irteera ezberdinak antolatu dituzte. Horietako bat Zerain eta Segurara eraman zituen.

Irteera oso interesgarria suertatu zen, eguraldiak eguna zapuzteko ahalegin guztiak egin zituen arren. Orain, bakarrik falta zaigu ikasle hauek eginiko lanaren emaitza ikustea, baina ziurtatu digute aurki guztion eskura jarriko dutela. Ea bideoa bezain polita ateratzen zaien.

Ikastolen Elkarteak bultzatuta, aurten argitaratu berri dute txosten bat non ikasleek Lehen Hezkuntzaren amaieran lortu beharko lituzketen IKT konpetentziak zehazten diren. Oso lan interesgarria iruditzen zaigu eta guztiok jakinaren gainean egon gaitezen hemen argitaratzea erabaki dugu.

Lan horren egileetako bat gure ikastolako irakasle bat da eta, beharbada, hurrengo batetan berari galdetu beharko dizkiogu txosten horren inguruko xehetasun guztiak. Baina hori beste baterako utzi beharko dugu.

Hemen zehaztutako konpetentzien lorpenerako, jarduera sorta interesgarria ekoiztu dituzte 3. ziklokoentzat eta eskura daude Txanela izenko webgunean.

Aspalditik ez genuen blog hau eguneratzen, baina nik uste dut ordua iritsi dela berriro astindu bat emateko.

Hemendik aurrera, blog honetan, gure ikastolako Lehen Hezkuntzan burutzen ditugun IKT jardueren berri emango dugu..

Jarduera horiek ilustratzen eta prozesu osoa azaltzen ahaleginduko gara.

Gaur, “hasiera” emateko, LH 4. mailako ikasleak, saio arrunt batetan, Acer Ultraeramangarriekin eta bestelako baliabideekin gelan lanean ikusiko ditugu beheko argazkietan. A ze poza 26 ikasle horiek Ubuntu erabiltzen ikustea!!!

Inauteriak gainean ditugu eta, ohiturari eutsiz, gure ikastolan buru belarri gabiltza prestakuntza lanetan.

Antolatzen dugun desfilea izan daiteke kanpotik gehien ikusten den ekintza, baina hori ez da gure ikastolan gai hau lantzerakoan egiten den gauza bakarra. Izan ere, Euskal Inauteriak jorratzea erabaki genuenetik, alde ludikoari bizkar eman gabe, beste motako helburuak lortu nahi genituela oso garbi ikusi genuen eta era guztietako jarduerak antolatzen hasi ginen gure ikasleekin desfileaz gain.

Aurten, adibidez, ahozkotasunari garrantzia berezia eman nahi izan diogu eta antolatutako lanketa guztia horrekin lotu dugu.

Burututako ekintzen artean, hona hemen ikasleekin landutakoaren laburpen txiki bat.

Lehen Hezkuntzako maila bakoitzak Euskal Inauterietako pertsonaia bat landu du. Taldeka antolatu dira egokitu zaien pertsonaiari buruzko informazioa bildu, ekoiztu eta azalpen testu bat osatzeko. Talde hauek prestaturikoa gainontzeko gela guztietan azaldu dute.

Lanketa hau burutu ahal izateko, elkarlanean aritu dira ikasleak nahiz irakasleak eta ikastolak jendaurreko azalpenak emateko ezarrita dituen oinarrizko irizpideak jarraituz, oso esperientzia aberasgarria bizi izan dugu eta zuekin guztiokin partekatu nahiko genuke.

Jendaurreko azalpenetarako oinarrizko irizpideak:

PRESTAKETA

1. Irakurketa burutuko duen ingurunea aztertu
2. Edukiak aukeratu, pilatu eta hierarkizatu
3. Diskurtsoa antolatu
4. Denborara egokitu
5. Baliabide osagarriak biltzen saiatu

JENDAURREKO AZALPENA

1. Hizlariaren aurkezpena: Jendaurreko diskurtso formalaren itxura eman beharko zaio.
2. Hizlariaren ekoizpena: Entzuleekin harremana eta norberaren rolak garbi geldituko dira eta hauek erakartzen ahaleginduko gara. Gaia kokatu beharko dugu eta, ahal bada, bitxikeriren bat kontatu entzuleen arreta eta jakin-mina pizteko. Edukiak igortzeko eta entzuleengana iristeko, adibideak erabiliko ditugu, ahots aldaketak, galderak tartekatuko ditugu, material osagarriak erabiliko ditugu, hizkuntza zuzena, denbora zaindu, entzuleari begira hitz egin, ondo ahoskatu, entzuteko moduan hitz egin, keinuak eta gorputzeko mugimenduak erabili…
3. Hitzuztea edo azalpenaren bukaera: Bukatu dugula esango dugu, eskerrak emango ditugu, galderak luzatuko ditugu ulertu den edo gustatu den jakiteko… Aurkezleak edo moderatzaileak amaiera gidatu beharko du eta hizlariari eskerrak eman orduko, nahi izanez gero, galdera- erantzunen tartea zabaldu eta gidatuko du.

Hori guztia gutxi balitz, Teknologia Berriek eskaintzen diguten aukeraz baliatuz, podcast bat sortu dugu ikasleek emandako azalpen horiek biltzeko eta bideo bat Youtuben jarri dugu. Argazkiak ere Ikastolako web orrian eta Flickr-en jarri ditugu.

Hona hemen pertsonaia bakoitzarekin grabatutako podcast-a:

• 1. maila:
  
• 2. maila:
  
• 3. maila:
  
• 4. maila:
  
• 5. maila:
  
• 6. maila:
  

Eta hona hemen, Youtuben jarri dugun bideoa:

Ondo pasa inauteriak!!!!!!